जेजू तूज्या पायांकडे
जाॅन आगियार
जेजू तूज्या पायांकडे
येवाचें दिसता घावन
तूज्याच भक्तीन हांव
आज बरयतां हें कवन
रीगयले तूवें काळजानीं
घडे बरे गूणांचे
आमच्या खातीर माडयले
तूवें कांटे जिणेचे
तूजेच वरवीं जालां म्हजें
जिणें आतां पावन
जेजू तूज्या पायांकडे
येवाचें दिसता घावन
तूज्याच भक्तीन हांव
आज बरयतां हें कवन
अस्तित्व ..
जाॅन आगियार
म्हजो हांवूच आसां अजून
संवय म्हजी सुटना
नवे चेहरे लावून म्हजेर
हांव सकाळचो उठना
नकल कोणाक करिना
फटींगपणां म्हाका पटना
कितल्योय काडी मारुन उडयात
उजो म्हाका पेटना
मुळां म्हजीं घट्ट आसात
अस्तित्व म्हजें मिटना
सूत जुळना.....
जाॅन आगियार
तुजे म्हज्या प्रगतीचें सूत जुळना
खंय किदें बिगडलां कांयच कळना
तूंच म्हजो उजवाड आसलो
जीणें कशें व्हरचे फुडें
एकसूरपणान जागतां हांव
काळोख सगळे कडेन
जीण सारकीच घुस्पल्या वाटच मेळना
तुजे म्हज्या प्रगतीचें सूत जूळना
खंय किदें बिगडलां कांयच कळना
म्हजी नदर तुजे नदरेक
कशीच किद्याक लागली ना
ताळो सुकून सुकला म्हजो
मोगाची तान बागली ना
प्रितीचो रोप बावला, फुलांच फुलना
तुजे म्हज्या प्रगतीचें सूत जूळना
खंय किदें बिगडलां कांयच कळना
आवय..
जाॅन आगियार
अजून ऐकटो आसता तेन्ना
म्हाका तुजी याद येता
काळोख जाता तेन्ना यादींनी
पेत्रोलाचो दिवो पेट्टा
न्हीद येता तेन्ना आवय
तुजी मांडी याद येता
भूक लागता तेन्ना तुज्या
हाताची उंडी याद येता
जोर येता तेन्ना कपलाक
घडी घालप याद जाता
जिणे विशीं तुजे धडे
अजून म्हाका याद आसा
तुजेच यादीन जगतां जीण
कशें फारीक करचें रीण
आपलेंच पांगरूण घालून
तुवें म्हाका न्हिदयलो
आपल्या पोटाक मारून
तुवें म्हाका वाडयलो
तुज्या मायेच्या सूखान आवय
म्हाका तुवें घडयलो
तुज्या खातीर....
-जाॅन आगियार
तुज्या खातीर एक कवन
बरोवचें आसा म्हाका
पोरणें मोगा गीत आज
झरवचें आसा म्हाका
मोगाचे घोंट हांव
हळू हळू पित रावलों
पचून वचूना ते आज
जिरोवचें आसा म्हाका
तुज्या खातीर एक कवन
बरोवचें आसा म्हाका
पोरणें मोगा गीत आज
झरोवचें आसा म्हाका
तूंवय म्हजेर मरतालें
हें खबर लेगीत नासलें
हातांत हात धरून आतां
मिरोवचें आसा म्हाका.
तुज्या खातीर एक कवन
बरोवचें आसा म्हाका
पोरणें मोगा गीत आज
झरोवचें आसा म्हाका
नवें वर्स
-जाॅन आगियार
नवीं किर्णी, नवीं सपना
नवें रंग, नवे उमाळे
नव्या वर्सा तुका येवकार दितां
उमेदीन भरुन दोळे
बरें वायट फाटल्यान गेलें
आतां किदें तूं बरें हाड
कडू आमट सोसून जालें
येतनां वांगडा गोडसाण हाड
मध्यान रातीर येवकाराक उबो
दवान भिजले म्हजे पोले
नवीं किर्णी, नवीं सपना
नवें रंग, नवे उमाळे
नव्या वर्सा तुका येवकार दितां
उमेदीन भरुन दोळे
गेल्य वर्सा परस तूज्या काळांत
आनीकय बरें जांव
ल्हाना पासून जांण्ट्या मेरेन
सगळे तजीच व्हडवीक गांव
खूशालकाय मनयतले तूज्या येण्याची
आमी गळ्यांत घालून गळे
नवीं किर्णी, नवीं सपना
नवें रंग, नवे उमाळे
नव्या वर्सा तुका येवकार दितां
उमेदीन भरुन दोळे
सां जुवांवचे फेस्त.....
-जाॅन आगियार
सां जुवांवचे फेस्त आयज नाच रे नाच
घुमट कासाळें वाजोवन नाच गों नाच
संवसारांत सांजावचें फेस्त नेटांन मनयतात
गोंयांत आमी बांयत उडी मारून गाजयतात
कोपीयांत जाय आमकां फेणयेचो वास
सां जुवांवचे फेस्त आयज नाच रे नाच
घुमट कासाळें वाजोवन नाच गों नाच
नवीं लग्न जाल्ली हे फेस्त फुलयतात
कपेलां घालून गोयकार नेटान मीरयतात
परंपरा गोंयची जाल्या हीं खास
सां जुवांवचे फेस्त आयज नाच रे नाच
घुमट कासाळें वाजोवन नाच गों नाच
फेस्ताच्या दिसा सांगोड सजयतात
बांयत उडकी मारुन सां जुवांव गाजयतात
सन्ना पणस आनी फळांची रास
सां जुवांवचे फेस्त आयज नाच रे नाच
घुमट कासाळें वाजोवन नाच गों नाच
